Le loup et la cigogne

Zot koné koma Loulou i gouman,
I kontan manz vitman vitman.
Sa enn mové zanimo ki ana tou sot vis
I pli volè ki sat; mé i pa oulé manz lé ra.
Son manzé pou li, bon mouton, poul, kabri, dend, koson.
I pa oulé fay fay manzé, son la tab touzou bien gani.
Pli mié ki la tab blan. En zou, i ti fè enn diné ek en pti mouton.
I aval enn lé zo an traver,
Lé zo i resté pri dan la goz.Magré tou, i pa tranglé,
Mé i komans tousé koma zans potriner: Kehen ! kehen !
Enn wazin i tann li, i di: «Konpè, ki ou gangné?»
- Pa kozé, komè; mo fin gangn tranglé. Ou pa kapab
Sey ti sa lé zo la dan mon la goz.» Lot i di:
«Mes mwa séyé. Doubout dwet, ouvè ou la bous.»
Loulou i ouvè son gran gel, oui a di enn four.
Lot i fouyé la dan ek son la bek.
Afos rodé, i trouv sa lé zo la, i ris déhò, bien kom i fo.
(Mwa ti oublié di, sa wazin la ti en fémel korbizo.)
Lè in fini, i démann Loulou son l’ azan. – «Ki ou di ?
L’azan ! ou pa di gran mersi mo pa ti aval ou,
Kan la mwatié ou lé kò ti dan mon gel? Foulkan!»

Dépi sa zou la zot di ki bef
Zamè di mersi la ter kot i manz zeb.