Gran sésé nou pati, nan péyi ou pa ka viré tounen.
Misyé Bazil, anbèn,  fè’y an kòchpat, san i ni tan wè.
I lésé nou nan bidim tjòk.
Nou rété estébékwé:
Poutji, poutji ???

Dlo zyé nou koulé,
Tjè nou voumtjatjé,
Lespri nou tjèbolizé,
Nanm nou an lenbé,
Kò nou flichonnen,

Nou la garé ka chaché konprann,
Dékontrolé jis vini dèkdèk.
I té Gran sésé nou,
Yo té menm nonmen’y:
«Manman kreyol»

Man sisi, la ou yé, kouté:
«Nou péké janm bliyé’w,
Davwa ou sèvi nou fondas,
Parapò fòs ou nan létid,
Magré gran laj ou.»