Fonnkër
Koulër blues

Marie Line Dijoux (La Réunion)

Souffleur
Souffleur à Saint Leu, Réunion. Photo F.P.

Koulër blues
Blues maloyër
Blues fonnkézër
Koulër blues
Blues maronër
Blues fangoyër
Ô koulër blues
Pou mon lang kréol
Kolér blues
Pou tir lespri la zol
Ô Kolér blues
Blues an kréol.

Zordi o fon parey avan
Kan dann tan lontan
Bann zesklav dann kan, dann bitasion,
Té forsé forz in maniér
Pou kozé sanm zot bann frér
Tousël anparmi d’ot frér
Fer, shène, travay, san
Kilé ou Lafrik O Momon?
Kilé zot bann frér Wolof, bann frér Yao
Kilé zot bann frér Yoruba, bann frér Yambane
Kilé zot bann frér Makwélé, bann frér Makondé
Kilé zot bann frér Malbar, bann frér Maligasé ?

Apré tanginn la mer sï bato dézespoir
Débarkman terla minm
Dann in péi paradi-lanfer
Koman désot la soufrans lo kor ?
Lot soufrans i gingn pa di
Zot bann frér laba lavé vann azot osi.
Té fasil, Ô granmèt, kass an dë la barbari,
Rann plïs total lo démounaz !
Koman kozé ?
Alorss ou la pousé, ou la liané mon lang kréol
Pou arash bann mo finfon lespri domoun démouné ;
Ou la rasiné tel in léritaz pou nou zordi
Nou pé kongn nout koko dosï galé bordmer
Nana ankor shabouk dan la min dominër.

Sépousa, zordi ofon parey avan,
Fo nou rak nout parol
Dann fangourin la dominasion
Narien ! ek mon tangol ma souflé
Ma souflé tanpirmipë
Dosï la brèz mon lang Rényoné
Epï ma shanté :
Koulër blues, blues maloyër
Blues fonnkezër
Koulër blues, blues maronër
Blues fangoyër
Ô kolër blues pou mon lang kréol
Kolër blues pou tir lespri la zol
Ô kolër blues, blues an kréol !

 
 
logo